पहिल्या दिवशी एकही अर्ज दाखल नाही
भोर
पुणे जिल्ह्यातील १४ नगरपरिषदा, ३ नगर पंचायतींच्या एकूण ३९८ सदस्यपदाच्या निवडणुकीसाठी सोमवारपासून (दि. १०) उमेदवारी अर्ज भरण्यास सुरुवात झाली. 'पहिल्याच दिवशी एकही अर्ज दाखल करण्यात आला नाही. यंदाच्या निवडणुकीत उमेदवारांना ऑनलाइन पद्धतीने अर्ज भरून त्याची प्रिंट काढून निवडणूक निर्णय अधिकाऱ्यांकडे उमेदवारी अर्ज सादर करावा लागणार आहे, अशी माहिती प्रशासन अधिकारी यांनी दिली.
पुणे जिल्ह्यातील १४ नगर परिषदा आणि ३ नगरपंचायती यांच्यासाठी आचारसंहिता लागू झाली आहे. या निवडणुकीसाठी १ जुलैची मतदार यादी ग्राह्य धरण्यात आली आहे.
भोर नगरपालिकेसाठी एकूण १०प्रभाग असणार आहे. तर २० नगरसेवकांची संख्या असणार आहे. या निवडणुकीत जनतेतून प्रथमच थेट नगराध्यक्ष निवड करण्यात येणार आहे. १७ नोव्हेंबरपर्यंत ऑनलाइन अर्ज भरावा लागणार,असून पहिल्या दिवशी एकही अर्ज दाखल झाला नाही
. निवडणुकीचे वेळापत्रक
उमेदवारी अर्ज भरण्याचा कालावधी :
१० ते १७ नोव्हेंबर (दुपारी २ वाजेपर्यंत)
अर्जाची छाननी : १८ नोव्हेंबर
अर्ज माघारी : १९ ते २१ नोव्हेंबर (दुपारी तीन वाजेपर्यंत)
निवडणूक चिन्ह वाटप : २६ नोव्हेंबर
मतदान : २ डिसेंबर
मतमोजणी : ३ डिसेंबर
अर्ज दाखल करण्यासाठी भोरकर मुहूर्ताच्या शोधात ?
भोर नगर परिषदेच्या पंचवार्षिक निवडणुकीसाठी उमेदवारी अर्ज दाखल करण्याचा सोमवारी (दि. १०) पहिला दिवस होता. मात्र, आठवड्याचा आणि अर्ज दाखल करण्याचा पहिला दिवस असूनही एकही उमेदवारी अर्ज दाखल झालेला नाही. त्यामुळे इच्छुक उमेदवार मुहूर्ताच्या शोधात आहेत की, नेत्यांच्या मंजुरीच्या प्रतीक्षेत आहेत? असा प्रश्न पडला आहे.
प्रशासनाची आवश्यक तयारी पूर्ण
निवडणूक सुरळीत पार पाडण्यासाठी प्रशासनाने सर्व आवश्यक तयारी केली आहे. नगरपरिषद हद्दीतील आठ इमारतींमध्ये एकूण २२ मतदान केंद्रांची व्यवस्था करण्यात आली आहे. या केंद्रांवर २५० ते ३०० अधिकारी आणि कर्मचारी नियुक्त करण्यात आले असून, देखरेखीकरिता आठ विशेष तपासणी पथके (व्हीएसटी, एफएसटी, एसएसटी आणि व्हीव्हीएसटी) कार्यरत राहतील. या निवडणुकीत एकूण १६ हजार ७१६ मतदार सहभागी होणार आहेत. नागरिकांनी लोकशाहीच्या बळकटीसाठी उत्साहाने मतदान करावे, तसेच निवडणूक प्रक्रियेला सहकार्य करावे, असे आवाहन निवडणूक प्रशासनाने केले आहे.
