निष्ठावान रेश्माताई बांदल यांची उमेदवारी जवळपास निश्चित?
कापूरहोळ
आगामी पंचायत समिती निवडणुकीच्या निमित्ताने कामथडी गणातील राजकारण ढवळून निघाले असून, संगमनेरच्या माजी सरपंच रेश्माताई नितीन बांदल यांच्या संभाव्य उमेदवारीने येथे भाजपची ताकद वाढण्याची चिन्हे आहेत. संगमनेर ग्रामपंचायतीवर यशस्वीरित्या कारभार केलेल्या रेश्माताई यांनी या गणातून निवडणूक लढवण्याचे संकेत दिल्याने आता येथील लढत अटीतटीची होणार आहे.
'थोपटे निष्ठा' आणि स्वच्छ प्रतिमा
रेश्माताई बांदल यांच्या उमेदवारीचे मुख्य आधारस्तंभ त्यांची स्वच्छ आणि अविरत कार्याची प्रतिमा आणि थोपटे घराण्याशी असलेली त्यांची दीर्घ व अविचल निष्ठा हे आहेत. राजकारणात सक्रिय असूनही त्यांच्यावर भ्रष्टाचाराचा कसलाही डाग नसणे, हा त्यांच्यासाठी सर्वात मोठा प्लस पॉइंट ठरणार आहे. माजी आमदार संग्रामदादा थोपटे यांचे मार्गदर्शन हा त्यांच्या राजकीय वाटचालीचा आधारस्तंभ आहे.
पाच वर्षांत कोट्यवधींचा विकास
सन २०१५ ते २०२० या काळात संगमनेर गावच्या महिला सरपंच म्हणून काम करताना, रेश्माताईंनी शिक्षणाच्या बळावर प्रशासकीय कौशल्ये दाखवत कोट्यवधी रुपयांचा निधी गावच्या विकासासाठी खेचून आणला. अंतर्गत रस्ते, भुयारी गटारे, पानंद रस्ते, घरकुल योजना, समाज मंदिर, ग्रामपंचायत कार्यालय इमारत, शाळा विकास आणि स्मशानभूमी विकास यांसारखी महत्त्वाची कामे पूर्ण करून त्यांनी महिला सरपंच 'विकास' करू शकते, याचा आदर्श घालून दिला आहे.
'पाण्याचे ऋण'
रेश्माताईंच्या सामाजिक कार्याचा सर्वात महत्त्वाचा भाग म्हणजे त्यांनी संगमनेर आणि माळवाडीसह पिण्याच्या पाण्याचा प्रश्न कायमस्वरूपी मार्गी लावला. त्यांनी 'घर तेथे नळजोड' योजना राबवून महिलांच्या डोक्यावरील पाण्याचे हंडे उतरविण्यात मोलाचे कार्य केले. 'पाण्याचे ऋण' कधी फिटत नाही या भावनेतून, येथील नागरिक त्यांच्या पाठीशी खंबीरपणे उभे असल्याचे दिसत आहे.
निवडणूक चूर्षीची होणार
कोणताही राजकीय वारसा नसताना केवळ सरपंच म्हणून केलेल्या कामांच्या, पक्षनिष्ठेच्या आणि जनसंपर्काच्या बळावर रेश्माताई बांदल कामथडी गणाचा सर्वांगीण विकास साधण्याचे उद्दिष्ट ठेवून निवडणूक रिंगणात उतरत आहेत. यामुळे कामथडी गणात आता एक अत्यंत चुरशीची लढत पाहायला मिळणार आहे.
