थोपटे निष्ठा आणि ५५ वर्षांची स्वच्छ कारकीर्द ठरणार निर्णायक.
कापूरहोळ
आगामी पंचायत समिती निवडणुकीच्या पार्श्वभूमीवर -कामथडी गणातील राजकीय घडामोडींना अचानक वेग आला आहे. संगमनेर गावातील अत्यंत अनुभवी आणि थोपटें निष्ठावान नेत्या श्रीमती शशिकला निवृत्ती (बाप्पू) गोरड यांनी या गणातून निवडणूक लढवण्याची स्पष्ट संकेत दिल्याने या गणाचे चित्र पूर्णपणे बदलले आहे. त्यांच्या प्रबळ दावेदारीमुळे कामथडी गणात मोठी चुरस निर्माण झाली आहे.
५५ वर्षांच्या निष्ठेचा आधार:
माजी चेअरमन (संगमनेर वि.का.सेवा सह.सोसा.) आणि माजी सदस्या (ग्रामपंचायत संगमनेर) असलेल्या शशिकला गोरड यांचा ५५ वर्षांचा सार्वजनिक जीवनातील अनुभव महत्त्वाचा ठरत आहे. त्यांचे दिवंगत पती, माजी सरपंच कै. निवृत्ती (बाप्पू) बाळासाहेब गोरड यांचे कार्य आजही पंचक्रोशीत स्मरणीय आहे. सर्वात महत्त्वाचे म्हणजे, थोपटे घराण्याशी त्यांची असलेली दीर्घ आणि अविचल निष्ठा (मा. अनंतरावजी थोपटे साहेब आणि मा. संग्रामदादा थोपटे साहेब यांचे सातत्याने मार्गदर्शन) हे त्यांच्या उमेदवारीचे मोठे आधारस्तंभ आहेत.
'पाण्याचे ऋण' आणि जनसंपर्क:
श्रीमती गोरड यांची ओळख केवळ राजकीय नाही, तर सामाजिक कार्यामुळे आहे. संगमनेर, माळवाडीसह अनेक गावांमध्ये त्यांनी पाणी व नळजोड योजना प्रथम राबवून महिलांचे पाण्याचे कष्ट कमी केले. 'पाण्याचे ऋण' कधी फिटत नाही, या भावनेतून पंचक्रोशीतील गोरड म्हसवली, वाकांबे, जोगवडी, आळंदे यासह अनेक गावांतील लोक आजही त्यांच्या कुटुंबासोबत आहेत. यामुळे त्यांचा व्यक्तिगत संपर्क केवळ मतदारांपुरता मर्यादित न राहता, कौटुंबिक आहे.
स्वच्छ चारित्र्य ठरणार 'गेम चेंजर':
राजकारणात ५५ वर्षे सक्रिय असूनही, त्यांच्यावर भ्रष्टाचाराचा कसलाही डाग नसणे, ही बाब आजच्या निवडणुकीच्या काळात अत्यंत निर्णायक ठरणार आहे. त्यांची ही स्वच्छ आणि अविरत कार्याची प्रतिमाच त्यांच्या उमेदवारीला सर्वाधिक बळ देत आहे.
राजकीय विश्लेषण:
श्रीमती शशिकला गोरड अर्थात 'गोरड काकी' यांनी रिंगणात उतरण्याचा निर्णय घेतल्याने, भोर-कामथडी गणातील निवडणूक आता अटीतटीची होण्याची शक्यता आहे. त्यांचे राजकीय वजन, सामाजिक कार्याचा मजबूत पाया आणि ५५ वर्षांचा निष्कलंक अनुभव पाहता, या गणात 'गोरड पर्व' पुन्हा एकदा सुरू होण्याची शक्यता राजकीय विश्लेषकांनी वर्तवली आहे.
