भोर
भारतीय जनता पार्टीला मोठा धक्का देत माजी आमदार संग्राम थोपटे यांचे कट्टर समर्थक आणि भोर नगरपरिषदेचे माजी उपनगराध्यक्ष रामचंद्र नाना आवारे यांनी कार्यकर्त्यांसह शनिवारी (दि. ८ नोव्हेंबर) रोजी पुणे येथे उपमुख्यमंत्री अजित पवार यांच्या उपस्थितीत माजी नगराध्यक्ष निर्मला आवारे, ऋषभआवारे यांच्यासह सहकुटुंब राष्ट्रवादी काँग्रेस (अजित पवार गट )पक्षात प्रवेश करून हाती घड्याळ घेतले आहे.
तालुक्याच्या राजकारणात मोठी उलथापालथ झाली आहे. नाना आवारे यांच्या प्रवेशामुळे भोर तालुक्यातील राजकीय समीकरणे पूर्णपणे बदलली आहेत. काही दिवसांपूर्वीच भारतीय जनता पक्षाने नगराध्यक्ष पदासाठी इच्छुक उमेदवारांच्या मुलाखती घेतल्या होत्या, त्यामध्ये आवारे यांनी भाजपकडून उमेदवारीसाठी इच्छुक असल्याचे सांगितले होते. परंतु आज अचानक पक्ष प्रवेश झाल्याने राजकीय वर्तुळात उलटसुलट चर्चेला उधाण आले आहे.
भाजपच्या गोटात या घडामोडीमुळे मोठी खळबळ माजली आहे. राष्ट्रवादी काँग्रेसमध्ये या प्रवेशामुळे भोर शहरात मोठी ताकद निर्माण झाली आहे. नगरपालिकेच्या निवडणुका डोळ्यासमोर ठेवून आवारे यांचा हा निर्णय भोर तालुक्याच्या राजकीय गणितावर मोठा परिणाम करणारा ठरणार आहे.
