बाठे यांचा 'क्रीडा' यज्ञ
पांडे येथे ६ तर करंदी खुर्द येथे ३८ एकर जागेवर क्रीडा मैदान
कापूरहोळ
ग्रामीण भागातील तरुणांना शहरी भागाप्रमाणे सुविधा मिळाव्यात यासाठी माजी आदर्श जिल्हा परिषद सदस्य चंद्रकांत बाठे यांनी विशेष पुढाकार घेतला आहे. तसेच त्यांच्या नेतृत्वाखाली गेली दहा वर्षांपासून भोर तालुक्यात नामशेष होत चाललेल्या कबड्डी खेळाला पुनर्जीवन मिळाले असून,तालुक्यात ४४ एकर जागेत दोन भव्य क्रीडांगणे उभारली जात आहेत.
किकवी तालुका भोर येथे आयोजित पत्रकार परिषदेत बाठे बोलत होते ते पुढे म्हणाले कि, भोर तालुक्यातील पांडे येथे सहा एकर जागेत ग्रामीण भागात पहिले क्रीडांगण तयार झाले आहे. यासाठी रू २१ लाख खर्च चंद्रकांत बाठे यांनी केले आहे. पोलीस भरती, मिलिटरी भरती आणि अन्य शारीरिक भरतीसाठी तयारी करणाऱ्या युवकांसाठी हे मैदान वरदान ठरणार आहे. वैयक्तिक आणि सामूहिक खेळासाठी हे क्रीडांगण सर्वासाठी खुले आहे.या मैदानावर खेळासाठी वेगवेगळे ट्रॅक तयार केले आहेत. आगामी काळात याच मैदानावर क्रीडा संकुल करण्यासाठी विशेष प्रयत्न करणार असल्याची माहिती बाठे यांनी दिली.
भोरतालुक्यातील संगमनेर ते खुलशी या भाटघर धरण परिसरातील युवकांसाठी करंदी खुर्द येथील गायरान जागेत ३८ एकरमध्ये दुसरे भव्य क्रीडांगण लवकरच उभे राहणार आहे. या दोन्ही प्रकल्पांतून युवकांना खेळासोबतच रोजगाराभिमुख तयारी करण्याची मोठी संधी उपलब्ध होणार आहे. बाठे यांनी या खेळाडूंना सर्वतोपरी मदतीचा हात पुढे केला आहे.
