1 लाख 20 हजारांचे शेतकऱ्याचे नुकसान
कापूरहोळ :
- राजगड पोलीस स्टेशन हद्दीत जनावरांच्या चोरीची घटना उघडकीस आली आहे. मौजे निगडे, तालुका भोर येथे अज्ञात चोरट्यांनी शेतातील गोठ्यातून चार म्हशी चोरीला नेल्याची घटना समोर आली असून, एकूण 1 लाख 20 हजार रुपयांचा माल चोरट्यांनी लंपास केला आहे.फिर्यादी अक्षय केशव काकडे (वय 29, व्यवसाय शेती, रा. निगडे, तालुका भोर) यांनी राजगड पोलीस ठाण्यात दिलेल्या फिर्यादीत म्हटले आहे की, दिनांक 28 ऑक्टोबर 2025 रोजी सायंकाळी सुमारे 6 वाजेच्या सुमारास ते 29 ऑक्टोबरच्या सकाळी 7 वाजेदरम्यान ही चोरी झाली. फिर्यादी यांच्या शेतातील पत्र्याच्या शेडमधील गोट्यात ठेवलेल्या गावरान जातीच्या चार काळ्या रंगाच्या शिंगी असलेल्या म्हशी अज्ञात चोरट्याने चोरून नेल्या आहेत. प्रत्येक म्हशीची किंमत सुमारे 30 हजार रुपये असून, एकूण नुकसान 1 लाख 20 हजार रुपयांचे झाले आहे.या प्रकरणी राजगड पोलीस स्टेशन मध्ये अज्ञात चोरट्या विरोधात गुन्हा दाखल करण्यात आला आहे. या घटनेमुळे शेतकऱ्यांमध्ये भीतीचे वातावरण निर्माण झाले असून, ग्रामीण भागातील जनावरांच्या सुरक्षेचा प्रश्न पुन्हा एकदा ऐरणीवर आला आहे.अधिकचा तपास राजगड पोलीस करीत आहेत.
