कापूरहोळ
पावसाने उघडीप दिल्याने भोर तालुक्यात भात कापणीची लगबग सुरू झाली आहे. मे महिन्यात सुरु झालेला पाऊस तब्ब्ल सहा महिने पडत होता. त्यामुळे भाताचे पीक हातचे जाते कि काय अशी भीती शेतकऱ्यांना वाटत होती परंतु गेली सहा सात दिवस पाऊस उघल्यामुळे बहुतांशी शेतकऱ्यांकडून भात काढणीच्या कामाला सुरुवात केली आहे.परंतु कापणीसाठी मजूर मिळत नसल्याने हार्वेस्टर ने भात काढणी वेगात सुरु आहे. त्यामुळे हार्वेस्टरला मागणी वाढल्याचे चित्र आहे.
अतिवृष्टी मोठ्या प्रमाणावर झाल्याने भात लावणी उशिरा झाली होती. भात शेती कामासाठी मागील दोन तीन वर्षांपासून मजूर मिळत नसल्याने शेतकरी वर्ग हा यंत्रसामुग्रींचा शेतीकामासाठी वापर करताना दिसत आहे.
हवामानाचा अंदाज 'पंजाबराव डख'
राज्यात पुढील १५ दिवस पावसाची कोणतीही शक्यता नसून, ११ नोव्हेंबरपासून थंडीची तीव्र लाट येणार असल्याचा अंदाज प्रसिद्ध हवामान अभ्यासक पंजाबराव डख यांनी वर्तवला आहे. ही थंडी पुढील १५ दिवस टिकून राहणार असून, दिवसादेखील गारठा जाणवेल, असे त्यांनी म्हटले आहे. रब्बी हंगामातील पेरण्यांसाठी हे वातावरण अत्यंत पोषक असल्याने शेतकऱ्यांसाठी ही आनंदाची बातमी असल्याचेही डख यांनी सांगितले.
त्यांच्या मते, राज्यात आता पावसाळी वातावरण पूर्णपणे निवळले आहे. ११ नोव्हेंबरपासून उत्तरेकडील थंड वारे महाराष्ट्रात दाखल होतील, ज्यामुळे थंडीचा कडाका वाढण्यास सुरुवात होईल. ही थंडीची लाट पूर्व विदर्भ, पश्चिम विदर्भ, दक्षिण महाराष्ट्र, उत्तर महाराष्ट्र, कोकण किनारपट्टी, खान्देश आणि मराठवाडा या सर्वच भागांमध्ये जाणवणार आहे.
