वेळू -नसरापूर गटात मुळ ओबीसी कोण?

 मतदारात चर्चेला उधाण, मूळ ओबीसीवर होतोय अन्याय?

कापूरहोळ

पुणे जिल्हा परिषदेच्या होऊ घातलेल्या निवडणुकीत वेळू-नसरापूर गटात मूळ ओबीसी कोण या बाबत जनतेत संभ्रम निर्माण झाला आहे. नव्याने कुणबी दाखले काढून निवडणुकीत मागास प्रवर्गात निवडणूक लढण्यासाठी उमेदवार तयारीला लागले आहेत. त्यामुळे मूळ ओबीसी म्हणून पूर्वी ज्यांनी दाखले घेतले आहेत असा मतदार पुर्ता गोंधळला आहे. या समाजाला आपल्यावर अन्याय होत आहे अशी भावना निर्माण झाली आहे. त्यामुळे या गटात मतदार आपल्याला स्वीकारतील का या भीतीपोटी उमेदवार आपली उमेदवारी जाहीर करण्यासाठी वेळ घेत आहेत.

राजकीय समीकरणांचे गणित पुन्हा एकदा बदलताना दिसत आहेत. या गटासाठी इतर मागास प्रवर्ग (ओबीसी) आरक्षण घोषित झाल्याने स्थानिक पातळीवर उमेदवारीच्या हालचालींना वेग आला आहे.या मतदारसंघात मूळ ओबीसी की प्रस्थापित कुणबी या दोन प्रवर्गातील उमेदवारांपैकी कोणाला समर्थन मिळणार हा कळीचा मुद्दा झाला आहे.

इच्छुक उमेदवारांनी दिवाळी निमित्त मिठाई,, साडी वाटप, सामाजिक उपक्रम यांच्या माध्यमातून जन संपर्क सुरु केला आहे. मतदारसंघात अठरापगड जातींपैकी काहित नाराजीचे नाट्य सुरु आहे.मागील काही निवडणुकांत ठराविक समाजांकडे प्रतिनिधित्व झुकल्याची भावना या समाजात रुजली आहे. 

शासनाच्या नवीन अध्यादेशानुसार आरक्षणाच्या अंमलबजावणीतील बदलांमुळे जाती पाती चे राजकारण बदलाची चर्चा सुरु आहे.त्यामुळे पक्षीय उमेदवारी देताना मूळ ओबीसी समाज घटकाला देणार कि दुसऱ्या गटातून उमेदवार आयात करणार यावर अनिश्चित्ता निर्माण झाली आहे.