अजितदादाचा वादा, स्थानिकांसाठी ७० टक्के जागा

पुणे जिल्हा बँकेत लेखनिक, शिपाई आणि वाहनचालक आदी १०८० पदांसाठी मेगा भरती 

पुणे

पुणे जिल्हा मध्यवर्ती सहकारी बँकेमध्ये आगामी काळात लेखनिक, शिपाई आणि वाहनचालक आदी सुमारे १हजार ८० पदांसाठी भरती प्रक्रिया राबविली जात आहे. भरती करताना पुणे जिल्ह्यातील शेतकऱ्यांच्या मुलांना प्राधान्य देण्यासाठी शक्य असेल, तेवढी मदत करू, असे आश्वासन उपमुख्यमंत्री अजित पवार यांनी दिले होते. त्यानुसार उपमुख्यमंत्री अजित पवार यांनी शासनाकडे पाठपुरवा केला होता. अखेर राज्य शासनाच्या सहकार विभागाचे अपर निबंधक संतोष पाटील यांच्याकडून यासंदर्भातील निर्णय जारी करण्यात आला आहे.

जिल्हा बँक ही सहकार, ग्रामीण आणि कृषी क्षेत्रासाठी महत्त्वाची आहे. ग्रामीण विकासात जिल्हा बँकेची भूमिका महत्वाची आहे . जिल्हा बँकांचे सभासद हे त्याच भागातील शेतकरी व नागरिक असतात. त्यामुळे नोकरभरतीमध्ये स्थानिकांना प्राधान्य देण्यात यावे, अशी मागणी अनेक जिल्ह्यांमधून वारंवार होत होती. २०२५ मध्ये पुणे जिल्हा मध्यवर्ती सहकारी बँकेच्या वार्षिक सर्वसाधारण सभेत सुद्धा सभासदांनी हीच मागणी केली होती.

जिल्हा मध्यवर्ती सहकारी बँकांचे कार्यक्षेत्र त्या-त्या जिल्ह्यापुरते मर्यादित असते. त्यामुळे स्थानिक उमेदवारांना प्राधान्य दिल्यास असे कर्मचारी बँकेचे ग्राहक, सभासद, ठेवीदार यांना अधिक चांगल्या प्रकारे सेवा देऊ शकतात .

सहकार विभागाने आयबीपीएस, टीसीएस आणि एमकेसीएल या तीन कंपन्यांची पदभरतीसाठी नियुक्ती केली आहे. जिल्हा मध्यवर्ती सहकारी बँकांनी या कंपन्यांमार्फत पदभरती राबवावी, असे आदेश दिले आहेत. 

प्रक्रिया ऑनलाइन

पदभरतीची प्रक्रिया संपूर्ण ऑनलाइन असणार आहे. त्यामुळे पदभरतीत अनियमितता करण्यास कुठेही वाव राहणार नाही. राज्यातील जिल्हा मध्यवर्ती सहकारी बँकांमधील नोकरभरती प्रक्रिया अधिक पारदर्शक आणि कार्यक्षम करण्यासाठी राज्य शासनाने हा महत्त्वाचा निर्णय घेतला आहे. यापुढे जिल्हा बँकांमधील नोकरभरतीमध्ये जिल्ह्यातील नागरिकांसाठी ७० टक्के जागा राखीव ठेवण्याचा निर्णय घेतला आहे.

सूत्रांकडून मिळालेल्या माहितीनुसार पुणे जिल्हा बँकेची भरती ऑनलाईन अर्ज प्रक्रिया 1 डिसेंबर 2025 रोजी सुरू होईल. अर्ज करण्यासाठी अंतिम मुदत 20 डिसेंबर 2025 निश्चित करण्यात आली आहे. संपूर्ण अर्ज प्रक्रिया आणि शुल्क भरणा ऑनलाईन पद्धतीनेच होईल. इच्छुक उमेदवारांनी बँकेचे अधिकृत संकेतस्थळ www.pdccbank.in येथे जाऊन अर्ज करावा.ऑनलाईन परीक्षेची तारीख तसेच प्रवेशपत्र डाउनलोड करण्याच्या आणि मुलाखतींच्या तारखा पुढील काळात संकेतस्थळावर स्वतंत्रपणे प्रसिद्ध केल्या जातील. उमेदवारांनी अद्ययावत माहितीसाठी संकेतस्थळ नियमितपणे तपासण्याचे आवाहन बँकेकडून करण्यात आले आहे

पुणे जिल्हा मध्यवर्ती सह. बँकेत १०८० पदासाठी नोकर भरती होणार असून त्यामध्ये पुणे जिल्ह्यासाठी जवळजवळ ७५६ जागा आरक्षित असणार आहेत. त्यामुळे पुणे जिल्ह्यातील स्थानिक तरुणांना मोठी संधी उपलब्ध झाली आहे.