चोरटे पसार, पोलिसांचा शोध सुरु
भोर
करंजगाव ता.भोर येथे बंद घराचे कडी कोयंडे तोडून तब्ब्ल १७ लाख ४९ हजारांचा ऐवज चोरुन चोरटे पसार झाल्याची घटना घडली आहे. या बाबत मारुती भैरु मळेकर यांनी अज्ञात चोरट्या विरोधात भोर पोलीस ठाण्यात फिर्याद दाखल केली आहे.
पोलिसांनी दिलेल्या माहितीनुसार, मळेकर पत्नीसह इयत्ता पाचवीत शिकत असलेल्या नातवाच्या शाळेत कार्यक्रमासाठी दि. १४ रोजी महुडे (ता. भोर) येथे गेले होते. कार्यक्रम संपवून घरी परतल्यानंतर दरवाज्याचे कडी-कोयंडे तुटलेले दिसले. घरात प्रवेश केल्यानंतर लोखंडी कपाटाचे लॉक तोडून त्यातील तीस हजार रुपये रोख आणि सुमारे २८ तोळे ६.५ ग्रॅम सोन्याचे दागिने असा एकूण १७ लाख ४९ हजारांचा मुद्देमाल चोरट्यानी चोरून पसार झाल्याचे दिसले.
भोर पोलीस ठाण्यात सदर घटने बाबत गुन्हा दाखल होताच घटनास्थळी पंचनामा करण्यात आला असून पुढील तपास पोलीस निरीक्षक आण्णा पवार यांच्या मार्गदर्शनाखाली महिला सहाय्यक पोलीस निरीक्षक दिप्ती करपे आणि ठाणे अंमलदार सुनील चव्हाण करत आहेत.
